Í eldhúsinu er auðvelt að innleiða önnur efni en plast. Þó er óþarfi að henda öllu plasti sem þar er að finna. Hluti má endurnýja smátt og smátt eftir því sem þeir slitna.

  • Eldhúsáhöld: Notum skálar og sleifar úr viði eða málmi og skurðarbretti úr viði en ekki úr plasti.
  • Uppþvottabursti: Notum trébursta eða margnota klút í staðinn fyrir uppþvottabursta úr plasti.
  • Ruslafata: Notum dagblöð eða maíspoka í ruslafötuna í stað plastpoka (þetta á einnig við um aðrar ruslafötur á heimilinu).
  • Matreiðsla: Oft má spara plastnotkun með því að gera mat frá grunni t.d. jógúrt, majónes og fleira.

Í eldhúsinu höfum við oft ýmis áhöld úr plasti sem einnig er hægt að fá úr öðrum efnum, t.a.m. skálar úr viði eða málmi í stað plasts, og sleifar og skurðarbretti úr viði en ekki plasti.

Einnig þykir venjulegt að nota uppþvottabursta úr plasti í uppvaskið en mjög þægilegt er að nota einfaldlega margnota klút í staðinn eða uppþvottabursta úr tré.

Að sjálfsögðu hvetjum við engan til að henda plastáhöldum sem þegar eru til á heimilinu og eru í fínu lagi, en þegar kemur að því að kaupa ný þá mælum við með því að skoðuð séu áhöld úr öðrum efnum en plasti.

Alger óþarfi er að pakka ruslinu sem til fellur á heimilinu í plast áður en það fer út í tunnu, og bæta þannig heilum plastpoka við hvern skammt af rusli. Betra er að setja ruslið beint í fötuna, tæma úr henni í tunnuna og skola hana með heitu vatni eftir á. Allt þetta tekur álíka langan tíma og það tekur að loka ruslapokanum, fara með hann út í tunnu og setja nýjan poka í fötuna. Einnig er hægt að setja dagblöð í botninn á ruslafötunni og þá loðir minna við hana eftir að hún hefur verið tæmd.

Mikið af þeim mat sem við kaupum venjulega í plastumbúðum er auðvelt að útbúa sjálf/ur heima. Þar má t.d. nefna skyr, jógúrt, möndlumjólk, múslístykki, majónes og hinar ýmsu sósur.

Hér má finna tengla á nokkrar einfaldar og góðar uppskriftir:

Möndlumjólk

Hægt er að kaupa möndlur í eigið ílát t.d. í Matarbúri Kaju og möndlumjólkina er hægt að nota í flest sem venjuleg mjólk er annars notuð.

https://gydadrofn.com/2014/09/24/uppskrift-mondlumjolk-skref-fyrir-skref/

Skyr

Í Efstadal II við Laugarvatn er hægt að kaupa óhrært skyr í pappírsumbúðum eins og í gamla daga og mælum við með kaupum á því fyrir þá sem eiga leið þar um, en einnig er hægt að búa til sitt eigið skyr úr mjólk og hræra það sjálf/ur. Þá fær maður einnig mysu sem er nýtilegt í hinar ýmsu uppskriftir.

http://hidblomlegabu.is/skyr/

Gott þykir svo að hræra skyrið með eggjarauðum auk sykurs og mjólk/rjóma, sem gerir það næringarríkara og gefur ljósgulleitan blæ.

Jógúrt (vegan)

Skemmtileg áskorun væri að gera sína eigin heimalöguðu jógúrt.

http://www.maedgurnar.is/uppskriftir/lesa/heimalogud-jogurt-vegan

Múslístykki

Innihaldið má flest kaupa í eigin ílát t.d. í Matarbúri Kaju.

http://grgs.is/2014/02/18/orkunammi-med-trollahofrumdodlum-mondlum-og-dokku-sukkuladi/

Majónes

Majónes er mjög auðvelt að búa til frá grunni og er tilvalinn grunnur í alls konar kaldar sósur.

http://www.visir.is/g/2014140529316

Ertu með ábendingu? Taktu þátt í umræðuhópnum um Plastlausan september á Facebook eða sendu okkur tölvupóst.

Loka yfirliti